Вше бул любопитлїви, о шицким сцел дознац вецей, роздумац о информацийох, вицагнуц з нїх поуку за роботу або як би дознате могол похасновац у власним живоце. Ище давно, на початку 60-тих рокох, як найлєпши млади технїчар у керестурскей школи з дня на дзень розоткривал тайни о струї, о електромоторох, ришовал загадки зоз физики през праксу. За ньго ше насиґурно знало же пойдзе до електротехнїчней школи. Закончел ю у Новим Садзе. Нєодлуга потим пошол до Чехословацкей дзе го поцагло познанство зоз Людмилу Смолову, будуцу супругу. Винчали ше 1971. року а свадзбу правели и у Словацкей и у Югославиї. Нємирни дух и жаданє за лєпше ютре приведли Мирка уж 1975. року до Канади. Почал робиц у Бут Енджинєринґ компани у Хамилтону, порихтал фамилийне гнїздо та сцигла и Людмила зоз малим сином Растїком. Прешли жиц до Брандфорду дзе Мирко нашол роботу у компаниї Масей Ферґусон и у нєй робел, потим, вецей як 15 роки. Подняли ше теди, паралелно, водзиц старосц о єдним будинку як суперинтенданти. Народзела ше и дзивочка Сения.
Жаданя були вше нови, плани вше рижнороднєйши и Мирко укладал стаємни усиловносци витвориц их. На початку 80-тих купели хижу и при нєй вельки овоцнїк. Праве таке яке шнїл у своїх снох ище давно пред тим єден керестурски шапутрак. Барз, барз любел рана у своїм овоцнїку, точнєйше гевти хвильки кед ше розвиднєло, кед ше розбовчовал нови дзень, нови живот, полни нових спокусох и планох. Теди шеднул медзи овоцово древка и провадзел виход слунка. И сликовал тото у його полней краси. Єдноставно, Мирко любел вельо того – любел затанцовац, складно, так як нїхто, зоз свою Людмилу або зоз любену шестричку Фемку. Любел лапац риби и так ше одпочивац. Любел Крачун, Вельку ноц и теди з радосцу помагал мацери Даринки пририхтац даєдни зоз традицийних єдлох за тоти швета. Любел або, лєпше поведзене, почитовал дїло Николи Тесли, бул вельки знавец о живоце и дїлу того науковца. Любел путовац, як по Онтарию, так и по цалей Канади, бул у Япону, на Куби, у ЗАД, у Доминиканскей републики, у Русиї..
А знаня зберал нєпреривно. Закончел хто зна кельо курси на месних коледжох у Брандфорду и Хамилтону, здобул тиж и квалификацию електричара, и далєй виглєдовал у обласци електротехнїки, провадзел иновациї, шедзел за компютером годзинами.
И вше мал велї жаданя, мали и вельки... а тото, барз вельке жаданє, же би бул своєй любимици, своєй дзивки Сениї на свадзби – нє дожил.
А так жадал... так жадал...
Мирко Колєсар, перши унук и дїдови Колєсарови и дїдови Джуджарови хтори го, озда и прето, барз любели, народзени 27. юлия 1947. року у Руским Керестуре нє могол надвладац остатнє препреченє – чежка хорота го однєсла од фамелиї, приятельох и рускей заєднїци у Канади дня 7. априла 2006. року. Пошол до памяткох скорей як досягнул свойо жаданя же би, як пензионер з наисце заслужену пензию, путовал по швеце. И же би ище раз пошол до його Керестура обисц родзину, прейсц ше по валалє, лапац риби на беґелю, стретнуц велїх познатих...
