Мис Саскачевана, провинциї у Канади!
    За прецизнєйши информациї нам преостало лєм контактовац самих Перепелькових. На телефон ше явела Олена, мац Тиянова, и дзечнє нам пояшнєла як до того пришло:
    - Тияна ходзела на курс за моделинґ ище кед зме були у Онтарию, и на веб сайту того курса мала и даскельо свойо фотоґрафиї. Кед ше зявел тот конкурс за “Мис Ґлоб Саскачеван” вона послала прияву и даскельо слики. О єден час хтошка ю наволал, мала таке як интервю, и то було шицко. Прешли вецей мешаци и ми уж думали же з того нє будзе нїч, медзитим, вони наволали єдного дня и сообщели ми же Тияна вибрана за “Мис Ґлоб Саскачеван”! Ту у провинциї нє мали такволани паджент алє окремни жири вибрал, спомеди 150 дзивкох, праве Тияну. Нєодлуга потим єй послали и коруну и ленту. Зоз тим, Тияна здобула право змагац ше за титулу “Мис Ґлоб Канада 2007”.
    - Оленко, як ши ше чувствовала, як мац, кед ши тото дознала?

    - Зрадовала сом ше барз! Перше сом нє верела, а вец сом, такповесц, нє могла присц ґу себе од радосци кед сом похопела же наша Тияна “Мис Ґлоб Саскачеван”. Тото зме дознали дзешка у половки юния а вец зме, за 1. юлий, Дзень Канади,

направели вельки приєм за наших людзох, поволали зме до обисца шицких Руснацох и приятельох, мали зме ту коло 100 особи.
    - Цо ма ушлїдзиц далєй на тим планє?
    - План таки же 2. авґуста Тияна ма одпутовац до Торонта, дзе ше у цеку авґуста орґанизує явне змаганє за вибор “Мис Ґлоб Канада”. Од 14. по 20. авґуст Тияна ма буц у хотелу дзе буду шицки учашнїци того конкурса. Там их буду пририхтовац, а 18,19 и 20. авґуста будзе главне змаганє за “Мис Ґлоб Канада”. Я пойдзем до Торонта коло 15. авґуста же бим була там под час главного вибору.
  

На сходзе у Перепелькових, 1. юлия 2006. року було и вельо младежи. Тияна ше, за памятку, висликовала зоз своїма пайташками и пайташами

 Тияна теди, кед сом бешедовал з єй мацеру, нє була дома. Ютредзень ше ми удало контактовац и зоз ню. Вона о тим гварела:
    - Досц ме прицагує обласц моделинґу, односно евентуална кариєра манекенки або дацо подобне и я, кед сом нашла тот конкурс, послала даскельо фотки и податки о себе. Дас о штири мешаци ме наволали, мала сом досц длугу и зложену розгварку з нїма, випитовали ме о шицким. Нєодлуга потим, явели нам же сом вибрана за “Мис Ґлоб Саскачеван”.
    - Була ши щешлїва?
    - Гей! Була сом барз щешлїва. То таке чувство як кед би ше вам витворел даяки сон, хтори бул лєм ваш, ваша мала тайна.
    - Цо обчекуєш?
    - До Торонта идзем на початку авґуста и будзем там по 26. Медзитим, паджент будзе од 14. по 20. авґуст. Цо обчекуєм?! Га, нє шмем ше вельо анї наздавац, медзитим, кажде од нас жада же би посцигнул кус вецей - значи, кед бим була голєм перша або друга провадзачка, було би то добре. То би було наисце сооl! Можем повесц же сом и возбудена и покус нервозна, цо и нормалне у таких файтох змаганьох.

 

    Тияна ма 18 роки. Тей яри закончела стредню школу и рихта ше далєй. У медзичаше, през лєто,

роби у Вал Марту. Хто зна, можебуц єй судьба будзе наклонєна праве у тих мешацох, кед є и иншак у процесу опредзельованя своєй власней будучносци. Шицко будзе познате после 20. авґуста!

 

 

 

 

 

На початок бока

 

 

 

Home / Главни бoк